तरलता संकट सम्बन्धमा अर्थमन्त्रीवीच छलफल

नेपाल उद्योग परिसंघका अध्यक्ष हरिभक्त शर्माको नेतृत्वमा गएको प्रतिनिधि मण्डलले माघ २० गते उप–प्रधान तथा अर्थ मन्त्री कृष्ण बहादुर महरासँग अर्थव्यवस्थाको विविध पक्षमा नीतिगत छलफल गर्‍यो । सो अवसरमा परिसंघको प्रतिनिधि मंडलले वित्तीय प्रणालीमा हाल देखा परेको तरलताको समस्या समाधान गर्न अर्थमन्त्री समक्ष  नीतिगत सुझाव प्रस्तुत गर्‍यो ।
२०७३ असोजदेखि प्रारम्भ भएको तरलता अभावले हाल बंैकिङ क्षेत्रबाट नयाँ कर्जा प्रवाह हुन नसकेको, पुराना कर्जाको ब्याजदर बढ्दै गएको, रकमको अभावले सन्चालन भईरहेका परियोजनाको निर्माण कार्य समेत रोकिन गएको, बढ्दो ब्याजदरले नेपालको औद्योगिक क्षेत्रको लागत बढेकोले यसको असर उपभोक्तामा पर्न जाने भएकोले यथाशिघ्र यसलाई सम्बोधन गर्न सरकारबाट सुधारात्मक कदम चाल्नु पर्ने कुरामा प्रतिनिधी मंडलले उप–प्रधान मन्त्रीको ध्यानाकर्षण गरायो । कर्जाको बढ्दो ब्याजदरले नेपाली उद्योगहरुको प्रतिस्पर्धात्मक क्षमतामा ह्रास आउने, आयात बढ्ने, लगानीमा गिरावट आउने, निर्यातमा असर पर्ने र रोजगारीका अवसरहरु घटेर अर्थतन्त्र संकुचन हुन सक्ने विश्लेषण गर्दै प्रतिनिधि मण्डलले नेपाल राष्ट्र बैंकसँग समन्वय गरी तरलता प्रवाह गर्ने विविध उपायहरु पनि सरकारसमक्ष पेश गर्‍यो ।
सो अवसरमा ज्ञापनपत्र बुझ्दै उप–प्रधान तथा अर्थ मन्त्री महराले नेपाल उद्योग परिसंघबाट प्राप्त सुझावहरु विभिन्न आयामबाट विश्लेषण गरी उपयुक्त नीतिगत व्यवस्था गर्न मन्त्रालय सकारात्मक रहेको जानकारी दिनु भयो । प्रतिनिधि मण्डलमा नेपाल उद्योग परिसंघका पदाधिकारी, गभर्निङ्ग काउन्सिल, राष्ट्रिय परिषद् सदस्यहरुको उपस्थिति रहेको थियो ।

alt